[ الأخطاء الطبيّة . . الى أين ؛‘ . . . !*

الْسَلآمُ عَلَيْكُمُ وَ رَحْمَةُ اللهِ وَ بَرَكَآتُهُ

اشحالكم يا رواد القسم النقاشي
اشتقت لكتابة موضوع هنا
و كالعاده أحمل لكم قصة من الواقع
لكن هذه المرة كنت أنا بطلة القصة
اتعذبت .. اتبهدلت .. صحتي راحت ..

هذي قصتي

و بإيدكم الحكم ..

.
.

اليوم : الإثنين 26 - يناير - 2009
المكان : أحد المستشفيات في دبي

قبل إسبوع حدد أحد الأطباء موعدا
لي لإجراء 3 عمليات في وقت واحد
العملية الأولى : استئصال اللوزتين
العملية الثانية : تفتيت اللحمية
العملية الثالثة : كوي اعوجاج في
غضروف الأنف بالليزر

الدكتور خبر أهلي إنه العملية ما بتاخذ وقت
يمكن ساعة بالكثير .. دخلت حجرة العمليات
الساعة 10 الصبح و ظهرت الساعة 1 الظهر

.
.

المهم بعد ما نشيت من البنج
خشمي مغطى بشاش و التنفس
صعب من الحنجرة لنه توه مستأصلين
اللوز منها .. ما عليه استحملي يا حمامة

يابوا لي أيس كريم و تميت في المستشفى
لين الساعة 8 في الليل عقب رخصوني
أمي سألت الدكتور : مب لازم تتم الليلة؟
الدكتور : لا مب لازم هي قامت من البنج
و بس لازم تاخذ أدويتها و بعد كم يوم تروم
تاكل كل شي عادي بس تعض عدل قبل البلع

أمي شلتني و روحنا البيت
تميت عالأيس كريم و الأدوية

اليوم : الأربعاء 28 - يناير - 2009
المكان : المستشفى ..

اليوم بيبطلون خشمي
يلست عالكرسي و طلب الدكتور
من أمي إنها تظهر برع الحجرة
و يلس الدكتور و وراه الممرضة
و بطل الشاش .. و يود الملقط
و سحب الشاش .. و الظاهر إنه
كان عالق فمطاه .. محد يتصور
الألم .. لكني ما رمت أصرخ و ظنيت
إنه شي عادي لكن الدكتور ويهه
انجلب يوم شاف داخل خشمي و ياب
شاش يديد و بعد حشا خشمي و الأيودين
يحرق جروحي عقب ظهرت و سرت
حجرة الملاحظة .. بعد ساعة رجعت
الحجرة و بعد بنفس الأسلوب نظف خشمي
و روحت البيت و ما صدقت شفت السرير
و أسلمت روحي لسلطان النوم ..

يوم الأحد 1 - فبراير - 2009
الصراحة أنا مليت و قلت بسير
العزبة عند يدي و خوالي ..
سرنا أنا و هلي هناك بتنا الليلة
و يوم الأثنين في الليل خالوتي يت
من العين و يايبة لحم و بتشوي
شوينا و في دخان العزبة و الروايح
يدوتي سوت لي سندويجه جبن
و أقسم بربي كان ألين خبز كلته بحياتي
اليوم اللي بعده بتخلص إجازتي و برجع
المدرسة ..

اليوم : الثلاثاء 3 - فبراير - 2009
المكان : المدرسة الحصة الأولى

و أنا يالسه في الصف
ولا شي غريب ينزل في بلعومي
بلعته .. قلت يمكن هذي القطرة
و الحين نزلت .. لكن السائل ما وقف
و حطيت اصبعي في بوزي ..
و دارت في الدنيا يوم شفت اصبعي

أحمر ..

دم ..

ما وعيت إلا على ربيعاتي يشلوني
و يودوني حجرة الممرضة
بس الممرضة ما وصلت لين الحين
بس ما رمت استحمل و ركضت الحمام
و جيش البنات لاحقني .. وقفت عند
المغسلة و تميت أرجع دم .. يت مديرة
القسم و أبلة الكيميا و مدرسة الرياضة
خذوا لي إذن إنه أسير حجرة الممرضة
في قسم الأولاد لنه الممرضة موجوده
و شلتني أبلة الكيميا و ربيعتي و ودوني
قسم الأولاد و هناك الممر كان فاضي
حمدت ربي و أول ما وصلت تميت أرجع
دم .. أحمر .. طازج
كانوا بيودوني بالاسعاف لكن أمي وصلت
وشلتني و اتلاقينا مع أبوي في العيادة
و لما دخلت عند الدكتور تم يصارخ عالممرضات
و دخلوني العمليات .. قالوا لنا إنه شريان عندي
ملتهب و انفجر و إنه بيعطيني بنج موضعي
لكن الوالد ما رضى و حطوني في بنج كامل
و الدكتور قال إنه العملية ما بتاخذ أكثر عن 10
دقايق .. دخلوا فيَّ 3 إبر تخدير و تميت في العمليات
ساعتين إلا ثلث نشيت من البنج مدوخه و شو ها الشاش
عخشمي سألت الممرضة قالت لي إنه كان في
خطأ و اضطروا يسوون لي العملية من يديد لاعت جبدي و رجعت
بلغم .. أحماض .. دم .. و ركبوا لي وحدة دم أو سالب
و تميت في المستشفى و الدكتور ما يا عندي
الساعة 9 في الليل يعني بعد مرور 8 ساعات
على العملية .. اتكرم الدكتور و رخصني

اليوم :الأربعاء 4 - فبراير - 2009
المكان : مستشفى دبي الكبير

الوالد ما رضى عن نتايج عمليتي
و إني نقصت أكثر عن 5 كيلوات
و اصفر لوني فالوالد وداني من
الصبح لمستشفى دبي الكبير
و في الزحمة لين ما وصلنا ..
دخلت عند الأخصائية و لما خبرها الوالد إني رجعت دم
قالت : جيه الدكتور ما خبركم بمخاطر العملية؟
و عطتنا ورقة طويلة عريضة عن مخاطر العملية
و حسب تشخيصها أنا كنت أنزف داخليا
بدون ما أعرف لني خسرت دم و اضطروا
يركبون لي دم زيادة و إن حالتي تكون واحد
في المية ألف بس كان لازم حد ينبهني
و إني لو تميت أنزف كان ممكن أموت
و أتم مراقبة طول الليل مب أترخص بعد ساعات من العملية
و إنه الالتهاب نتيجه عن انحراف الليزر
و إنه خشمي التهب بسبة قطعة شاش
تامة فيَّ من إسبوع .. و شلت لي الشاش
و عطتني إبرة أنتي بايوتك قالت لي أسير
أسوي تحليل دم .. نسبة الهيموجلوبين عندي
11 و لازم تكون 13 .. ركبوا لي غلوكوز
و لما خلصت .. الدكتورة قالت لي
إنه ما أتعرض للشمس
و لا أجرب من الروايح النفاذة
و لا أجرب من الأكل الخشن
و أرتاح في السرير لمدة 3 أيام
و ما أطلع من البيت
و عقب سويت بعد تحليل و نسبة الهيموجلوبين
ارتفعت و استوت 12 فاصلة 5
و رجعت البيت و بدا سيل الاتصالات
من هلي و ربيعاتي و مدرساتي ..

.
.

سواء كان مستشفى خاص
و لاّ حكومي ..

الأخطاء شائعة
و ممكن تصير
لكن على الأقل
لازم ينبهون المريض
بالأعراض الجانبية
و مخاطر العملية

يعني الحين الخطأ من منوه؟!

بيدكم القرار

و دعواتكم لي

خويتكم

ặℓ~мặzυŋặ..}

بصراحه الخطأ احسه من المستشفى يوم انهم حطوا واحد يقولوله دكتور <<<معنه مو مبين
حطوا دكتور لا يعرف شي عن شغلته ولا هم يحزنون
يعطيج العافيه تسلمين اختي

انا بعد احس الغلط من الدكتور والي حاطه دكتور يله عالعموم سلاااااااامات الغاليه

سڷآمآٺ اڷڠ ـآڷيۃ ۈما ٺشۈفينً شر

هـآ گڷہ ڦضآء ۈڦڍر ~ ڷآ ٺבـطينً اڷڷۈم ع בـڍ ..

ۈ اڷمفرۈض آنً اڷڍگٺۈر يבֿـبرچ بمבֿـآطر اڷعمڷيۃ ْ ~ اڷڷہ يسآمבـ اڷچميع ۈيشفيچ

اوبس حمد اللهـ ع السلاامه و ما تشوفين شر

الصراحه الخطاء من المستشفى و من الدكتور الغبي شو ها ما يعرف عن حياه الناس ولا شوووو

اللهـ يكون في عونج غلااااي

مع احترامي للدكاتره اللي قد المسؤوليه..
بس الغلط من الدكاتره اللي يحطونهم..لاخبره ولاقد المسؤوليه ولاقد الثقه يشتغلون اي شي>>طبعا البعض مب الكل..

تقبلوا مروووري>> شيختكم